Fréttatilkynning
"Ísland örum skorið"
19. janúar 2005

Tíu íslensk náttúruverndarsamtök gefa út Íslandskort, "Ísland örum skorið", sem sýnir hvaða breytingar verða á miðhálendi Íslands ef stóriðjuáform stjórnvalda ná fram að ganga.

Í tilefni af útgáfu kortsins verður haldinn kynningarfundur á Hótel Borg föstudaginn 21.janúar kl. 13.00. Fundarstjóri er Ásta Arnardóttir leiðsögumaður og jógakennari. Dr Sigríður Þorgeirsdóttir heimspekingur kynnir kortið og erindi flytja: Guðmundur Páll Ólafsson náttúrufræðingur og rithöfundur, Þorvaldur Þorsteinsson myndlistarmaður og rithöfundur og Dr. Ragnhildur Sigurðardóttir, líffræðingur. Rússíbanar spila ljúfa tónlist.

Markmið útgáfunnar er að upplýsa almenning um virkjana- og stóriðjuáform stjórnvalda og hvaða breytingar á miðhálendi Íslands þau hafa í för með sér. Kortið sýnir virkjunarkosti 1. áfanga Rammaáætlunar um nýtingu vatnsafls og jarðvarma sem gefin var út af iðnaðar- og viðskiptaráðuneytinu 27. nóvember 2003.

Ef standa á við orkufyrirheit stjórnvalda til stóriðju þarf að virkja allar helstu jökulár landsins með tilheyrandi uppistöðulónum. Við getum afstýrt þessu slysi.

Stórar vatnsaflsvirkjanir eru einfaldasta leiðin til raforkuframleiðslu fyrir orkufreka stóriðju. Þær eru hins vegar afar dýrkeyptar fyrir náttúru landsins. Skynsamlegasti kosturinn er að leggja stóriðjuáformin til hliðar og huga jafnframt að öðrum leiðum til orkuöflunar, t.d. djúpborunarvirkjunum sem valda minni náttúruspjöllum en vatnsaflsvirkjanir almennt gera. Þannig stöndum við vörð um náttúru landsins og nýtum best verðmæti þess til frambúðar.

Kortið mun gagnast vel í allri fræðslu og umræðu um málefni miðhálendisins. Því verður dreift ókeypis á opinberum stöðum um allt land og fæst einnig hjá útgefendum.

Kortið er gefið út af eftirfarandi samtökum:
Náttúruverndarsamtök Íslands
Fuglavernd
Náttúruvaktin
SUNN - Náttúruverndarsamtök Norðurlands
NAUST - Náttúruverndarsamtök Austurlands
Áhugahópur um verndun Þjórsárvera
Náttúruverndarsamtök Vesturlands
Umhverfisverndarsamtök Skagafjarðar
Náttúruverndarsamtök Suðvesturlands
Félag um verndun hálendis Austurlands.